湯種製作(第1次)

寫番個幾月網誌，

得來的感覺是：痛苦，

每日花至少1個鐘，

甚至兩三個鐘去執相擺上網，

搞到連運動也阻礙了，

真係好費事，除咗對住部手機，

就乜都停晒！

所以原本諗住唔再寫，

但又想做番紀錄，都係擺相上嚟就算，

內容簡化又精簡就好了。

數字屋掃貨(第2擊)

哈哈，今日繼續掃平貨，

今日補購6包烏冬同零食，

一到食飯時間買嘢，

啲OL係咁買咖啡，餅乾同小食，

多人到不得了！

不過零食仲貴過啲高筋粉，

多食又唔健康。

雙重黑芝麻包

好快就嚟到4月最後一日，

噚晚膽粗粗將黑芝麻包同埋米粉包合拼，

出嚟個包包就係咁嘞！

用番上次用開隻“米粉”，

噚日响“數字屋”搵唔到有賣。

首先將芝麻略炒，待涼備用

食譜用芝麻糊，但屋企得芝麻醬，照樣試吓。

製成品，

便當媽媽略嫌切包包時麵包邊太鬆化，

麵包肉咬落好香芝麻味，

如果唔想有食沙嘅感覺，

就唔好落太多芝麻！

★雙重黑芝麻米粉包食譜★

米粉 50g，高筋粉 200g，牛油 20g

*砂糖 12g(大1)

(如用無糖芝麻糊，糖可加至24g)

奶粉 6g(大1)，食鹽 4g(小3/4)

水 190ml，即溶酵母 4.2g(小1又1/2)

*芝麻醬(有糖) 50g

可自行改用無糖芝麻糊

炒芝麻 30g(黑或白芝麻均可)

數字屋759掃貨(第1擊)

平時好少幫襯“數字屋”，因為唔就腳，

自從有咗麵包機後，知道佢哋啲日本粉幾平，

就開始幫襯多咗。

=  =  =  =  =  =  =  =  =  =

有時“數字屋”會員價，額外仲有折，

啲麵粉係平到笑，

烘焙店係賣唔到咁平。

好似今次4月尾3日盤點又係掃貨好時機，

今日行咗兩次嘅戰果，滿載而歸。

雖然買咗好多嘢，

4張單加埋只係$226.10,好抵呀。

今日主力買麵包高筋粉，

另外買咗兩包蝴蝶粉($7包)，

兩包烏冬($7.1包)和1包通心意粉($7包)，

屋企仲有3包唔同牌子嘅高筋粉。

~  ~  ~  ~  ~  ~  ~  ~  ~  ~  ~

呢隻拉脱維亞出嘅高筋粉，

只係買咗一包(500g)試試，

七折後$5.5一包，

個個見到出產地都有點卻步，

銷程麻麻。

日本高筋粉原本想買多啲，

但一睇個食用限期咁短，

只敢買6包，

超抵價$15/1kg一包。

～  ～  ～  ～  ～  ～  ～  ～  ～ ～  ～

啡色嘅CJ高筋粉，

七折後$11.6一包，1kg裝，

又係買咗6包。

最後連埋屋企3包高筋粉，總共有16包高筋，

約一星期用一包，可以夠用四個月。

便當媽媽的FB

噚日朋友join個FB群組，

話裡面有好多整包包嘅分享，

話啱晒便當媽媽。

唉，便當媽媽一直都無FB,

以前玩開yahoo blog,

依家用咗Google 都未搞得掂，

FB容易操作嗎？

好似有點落伍連FB都冇！(¯(●●)¯)

要快啲上去開個户口 add 埋先

半磅亞麻籽杞子包

噚日剩番3塊麵包，

今日整半磅比老公就夠嘞！

◆  ◆  ◆  ◆  ◆  ◆  ◆  ◆  ◆  ◆

啲朋友問便當媽媽，

點解跟住我教嘅方法整半磅包，

整得唔靚或者唔成功嘅？

其實，便當媽媽初初都失敗過好幾次，

不過啲分享在3月頭，仲未寫到！

*  整半磅包要留意  *

1.份量和水要準確，用基本份量減一半就可以

2.用基本1號或快速3號模式

3.其他配料不要太多，雖然半磅道理上可落50g,

好似今日啲杞子只有11g,亞麻籽1湯匙

4.最好不要整全麥包，或較乾身嘅半磅包

5.比預約時間提早5～10分鐘取出就冇咁燶

◆  ◆  ◆  ◆  ◆  ◆  ◆  ◆  ◆  ◆

等今日嘅半磅包包轉個身嚟睇睇，

好似個饅頭仔，

又似個和尚頭，好可愛！

不如順便睇埋入面

◆  ◆  ◆  ◆  ◆  ◆  ◆  ◆  ◆  ◆

另外，分享埋小朋友今早嘅早餐

★粟米菠蘿午餐肉小粒 pizza 包加鮮奶★

◆  ◆  ◆  ◆  ◆  ◆  ◆  ◆  ◆  ◆

無花果全麥包(50%)

呢排天氣開始熱，

夜晚備整包前，

必用手機上天文台睇温度。

一睇，高過25℃

將食譜內的用水減10ml

↔  ↔  ↔  ↔  ↔  ↔  ↔  ↔  ↔  ↔

今日出爐麵包《無花果全麥包50%》

↔  ↔  ↔  ↔  ↔  ↔  ↔  ↔  ↔  ↔

唔經唔覺已經兩個幾月無去幫襯麵包店，

無論楼下也好，地鐵站連鎖店式麵包店也好，

好耐無踏足過。

間唔中問吓老公：你日日食包厭唔厭？

你估佢點答：車，你唔整，

我都係响寫字樓附近買包架啦，

不過買包可以搭杯奶茶唧嘛！

每日為另一半準備三文治是最傷腦筋，

唔多鍾意夾蕃茄，青瓜，煙肉，

淨係鍾意火腿芝士搭沙律菜。

今日整咗火腿蛋，

用保鮮紙包好再入盒，fit 晒。

星期天，閱讀樂

星期天，天氣相當好，

小魔怪終於考晒試，

(仲差5月頭一科英口試)

全家人都可以放下之前的緊張情緒，

早餐後便到書店打書釘。

●  ●  ●  ●  ●  ●  ●  ●  ●  ●

便當家睇書鍾意睇長篇系列，

當睇完一整套書籍係好有滿足感，

就好像和著者一齊經歷書中的情節，

不過難免有些失落，

因為又要為尋覓下一套書而傷腦筋。

●  ●  ●  ●  ●  ●  ●  ●  ●  ●

小魔怪諗住搵套『哈利波特』睇，

便當媽媽話等書展買，佢話等到頸長，

提議圖書館借，佢話啲書污糟邋遢又殘。

唉，之前屋企有碟，佢都驚到唔敢睇，

睇書又唔驚咩！

於是同佢行咗幾間書店，終於搵到有套裝，

可惜最尾一册書脊爛咗要換，

等20日先至有新貨返。

冇所謂啦，

便當媽媽估佢20日之內睇唔晒五册書呱！

●  ●  ●  ●  ●  ●  ●  ●  ●  ●

便當媽媽都唔執輸，

掃咗兩本運動書及三本烘焙書。

合桃豆漿軟包

早前一次過買咗6、7包高筋粉，

師奶心態：特價貪平，

呢個牌子嘅粉不知不覺已經用到第3包，

整出嚟嘅麵包都可以，

平嘢都有好嘢。

☆  ☆  ☆  ☆  ☆  ☆  ☆  ☆  ☆  ☆

今日順應老公要求整合桃包，

見到某書食譜介紹用糯米粉都可整到超軟包包，

屋企唔知幾時買咗包糯米粉，

未過期，又即管一試！

☆  ☆  ☆  ☆  ☆  ☆  ☆  ☆  ☆  ☆

將糯米粉用食譜內的水份開稀

☆  ☆  ☆  ☆  ☆  ☆  ☆  ☆  ☆  ☆

然後隨粉倒入機內，

之後倒埋豆漿及加埋油。

☆  ☆  ☆  ☆  ☆  ☆  ☆  ☆  ☆  ☆

今早打開部機，

見到個包包，又聞到陣陣香味，

筆者好介紹，食落口確實好鬆軟！

士多啤梨芝士杯

一口氣整咗6杯甜品.

便當家較喜歡 cream cheese 囗味嘅甜品,

原本個甜品係用蛋糕模定型,

不過為咗方便食,

又唔想個蛋糕模阻住個雪櫃,

所以改咗做杯裝。

吓，諗住一杯杯,

每次限住份量唔會咁容易食多咗，

點知便當媽媽太為食,

晏畫一杯,夜晚一杯,

明晚堂長跑課實做烏龜跑唔郁，hea hea!!!

第一次學整鏡面裝飾杯甜品,

原來好易整。

另外啲”靚心”甜品杯真係幾好用,

份量每次啱啱好，

只要每次食完洗亁淨，

下次又可以重用,

非常環保。

全麥包(50%)

每日方包，三文治，吃厭了？

轉一轉口味，

來一件厚切全麥包 pizza 做早餐，

加埋豆漿，

Yummy,yummy！

Pizza 包材料簡單

每次整全麥包，部麵包機預設無得調較烤色，

便當媽媽就覺得麵包外皮異常深色又厚㗎嘞！

半磅亞麻籽提子包

放完幾日紅日復活節假期，

又是要返工的日子，

兩位小朋友仍享受學校假期，

睡得甜一甜。

今早只需為老公準備早餐，

所以整半磅麵包已足夠，

便當媽媽只是將基本麵包全部減半便可以，

原機並不鼓勵整半磅，

不過唔理咁多，

人少少幾片麵包已足夠。

=  =  =  =  =  =  =  =  =  =  

<材料>

高筋麵粉125g

牛油5g

砂糖大1(约12g)

奶粉大1/2(约3g)

食鹽小1/2(约2.5g)

水95ml

即溶酵母小1/2(约1.4g)

=  =  =  =  =  =  =  =  =  =

整完出嚟個包外型都唔錯，

高度係平時嘅一平，好正常，

証明樣樣要試吓，

試過先知道原來係 work 嘅！

黑糖雜果仁全麥包(20%)

雖然今日是紅日假期，

便當家仍然留守香港，

幾天忙於參與教會禮儀，

今天少少偷懶，整方包罷了。