今次係第2次用麵包機整蛋糕，
上次個士多啤梨芝士蛋糕凍食熱食都咁好食，
今次再接再勵，包無失手。
* * * * * * * * * *
見生果籃隻香蕉開始出一點點黑色嘅梅花點，
平時都會在不情願之下，快趣食埋佢，
但今次決定擺多一兩日再熟啲先至用佢。
大家見到相果隻係替身，
真身實在太肉酸冇面見人。
* * * * * * * * * *
準備好材料就開始嘞，
記得整蛋糕要用低筋粉，今次試用韓粉，
將香蕉壓成蓉；雞蛋打勻；牛油座溶；
合桃要入焗爐焗一焗，會香啲；
準備檸檬汁；低筋粉及泡打粉要過篩；
便當媽媽會額外加半茶匙雲呢嗱油，提升蛋糕香味。
* * * * * * * * * *
一切準備好，先將牛油及糖倒入麵包鍋內，
設定模式為“15”，再按“開始”，
2分鐘後將其他材料也逐一倒進鍋內(合桃除外)，
攪拌過程中用膠刀將四邊嘅粉推回鍋內，
程序一攪拌過程約12分鐘。
* * * * * * * * * *
程序一完結時，部機會有"咇咇"聲响，
呢个時候，一隻手戴上手套，將鍋內的葉片拔出，
另一手持膠刀將黏附在手套及葉片的漿液挖回鍋內，
再用膠刀將鍋內(尤其沉積在鍋底)漿液輕輕拌勻，
最後將合桃混在其中，
合上蓋，再按"開始"，進入程進二烘焗階段，
需時約一小時。
* * * * * * * * * *
烘焗完後不要即時取出蛋糕，
利用牙簽，長竹簽或金屬試針檢查蛋糕中心部份是否熟透，
將竹簽拔出沒有漿液黏附爲之熟透，
相反就要追加時間烘烤，最多追加兩次，
每次最多20分鐘。
* * * * * * * * * *
今次便當媽媽個蛋糕就剛好熟透，
不用追加時間。
蛋糕外型有點像小山丘，好攪笑。
* * * * * * * * * *
起初便當媽媽提出整香蕉蛋糕是不獲家人支持，
但烘焗完，邀請兩位老闆品嚐時，
他們都吃得津津有味，
當然啦，便當媽媽特別切了兩側較鬆化給他們，
外層口感小小似曲奇餅，
但裏面軟綿綿，再配埋合桃，味道簡直非常配匹。
最令便當媽媽鼓舞的是，老公放工之時嚐了一件，
食完飯休息收看電視時又走入厨房食埋最後一件，
佢話好好味，所以再encore多件，真係爲食。
下次再整可以將香蕉份量由1隻改爲1隻半至2隻，
蛋糕的香蕉味會更濃郁！
